فنجان قهوة في ريرا






هذا الكلام الجميل أنا حفظتو من شريط المرحوم الشاعر عبد الكريم ود شعيت الشكري العيشابي
عليه رحمة الله من أهالي العمراب بالقرب من بريدة ريفي تمبول وهو شاعر من شعراء البطانة نظم أجمل لوحات الشعر القومي تكلم في البطانة وفي الإبل وفي البنات السمحات وأرجوا من الذين لهم إهتمام بهذا الأدب أن يحاولوا يبحثوا عن شريط ود شعيت لأنه تحفه إبداعية

أكان العرب نازلين في "السادة"..وجا احمد ود عوض الكريم والصادق من البريسي..والوطا صباح ..والصادق حلب شدوقو في العرب كورك:اروروروووك..علي طول حسو..
وكل زول شال سيفو وجوا جاريين قايلين في مشكلة ..
يا زول الحاصل شنو؟؟
قالهُن: حرّم عوجة مافي ..الجملُو قريب يشِد ..
شنو ؟؟
قالهُن "وزنين" فتوها في "القِليتة" .. نمشي نشوفا هي ماسكة دربالقِداما والله سوّتلها راي براها..
وهسع الحقيقية الجملو قريب كلو شدّا ..
قيّلوا في الصُباغ وإتراوحو في ريرة ..وباكر الضِحى جوا عِندها..
قدُر ماشافت الرَكُب ماشي علي البيت..وكان نازل في بيتا عبد اللهِ ود شوراني شبّحت البيت زادتو..مرقت علي الجُمال دلّت البِتقدرها..
والكيف جبنة بس ..
وجابت المويةاسقتُن ..وولعت الفحم يتهوزز مِتِل مَغس اللقربين ..وإشتغلت علي الجبنة ..
وهسع ختت الفناجين متل وليدات الفَصُل ..ومَلتِن على قدر المجتمع.

أحمد ود عوض الكريم قال : في حُكمُ مَجلَس : الما بجيب غَنوة فوق "وزنين" دي ما يشيل فنجانو..
قالولو : غن آ شيخ أحمد..
قال: لا ..السابقك علي الباب قولو يا أرباب .. يغني ود شوران دا ..
ود شوران قالُو: الغُنا فوق وزنين دي؟؟
شيخ أحمد قالُو فوق وزنين دي ..
ود شوراني قال:


سـمحة وضوقها لبن صهباء ودخلها مبسّط
شرفتا رِيل وكفيتا خيل وطُولها موّســـــط
من تاتاي قدومها وخطوتا الإنرصـــــــت
حسيت قلبي فارقني وكبِدتي إنقصــــــت
دا ود شوراني .
ادتو فنجانو .
وإتلفتت على الصادق كشمت. يعني أبتسمت إبتسامة عريضة


الصادق قالها:


لحظ ابصارو خصه اللحظة لي بصّاها
فرّا فواطرو تمرة فؤادي كع قصّـــاها
قدر ما اقول أتوب الون علي أنســــاها
مجلوقةً تقبّض في البدن داســـــــــاها


شيخ العرب عاين عليها هي ..
قاليها:


شماليقك نُضاف وصباكي ناقِع ماهــا
رُوبتِك قامِتك المربوعة تب قاســماها
جميل جِيدك مسجل والعقول لاسماها
دعجات خد وفادعاً في البهيم باسماها


وداهو علي بلة ود اب شُكُر.. قالُو:
نفسي الخاينة ابت الزاد وطريّت كيفا
هادي قصبة سقادي الموجا كاضم قيفا
معشوقتي الجميلة وديسا هدلو كتيفا
ركفة شام ظُرة وسمحة دهبة ومُهرة فُلوة وديفا

جادين ود المهيوب قاليها:


شرقان في جمالك وغلّبني أوصـــــــافك
وفيك جُملاً تمتع كل راوٍ شــــــــــــــــافك
الفارس اللِبس درع الدويدي بخــــــــــافك
مايقك عين جدي ودوف أم لبب في اردافك

أمُحُمّد ود الفكي حمد,ود أب ناجمة قاليها:


سَماحِك غير حِبُوب بَرتا وقفِيس حُجّاج
سماح اليبست دوف الطريفي الســــاج
شِعاع زور الغشيم الفي الظلام وجّاج
سماح الفرُوا براق السِــــــــرا الفجّاج


خالد ود علي قاليها:


لِسَان باهي الوريد المُو شرِف هـــراج
هُدود الصي عيون الغافي في السهراج
تفرذ زمهريراً في العضُـــــــــــم تلاج
يحلعُقد الضماير بســـــــــــمها الفلاج



ود شعيت قال:


سنهُور حاكم الدولة ابسِــلاحاً راج
ماخدة عليهو دبورتين علاوة وتاج
دَرعات عُنّز الريل الســماهِن هاج
طال حسر العليهُن ختت الإســلاج

الصِدّيق ود عباس قال :


جمال معشوقتي أبداً في البلد مافِيش
جمالاً خِلقة غير عَدلة لَباس وغشيش
ديفةالمرّحن بين ود قِدير وكشيـــش
جمالك فرضة والتانيات معاكي عويش

كرار ودكُردُم قالو:


يا الصِدِيق عشوقي الكتفو هدلو الريــش
مضروب الغرام قال الحكيمما بعيـــــش

قبلي أم درعة بدري وصيدت في الديش
كتير الترّكتلُو كتابو وكَترالهيــــــــــش


رانفي ود اللافِض قال:


عشوقتي كحيـــــــــــــــــــــــلة الرُميش
أديبة وراسيةمي ام لكعة المشيها رشيش
جرحها نازي دافِق دم فؤادي بشـــــيش
درعاء و للكُلوهاتجوز قُمارها دِشــــيش

عبد الله ود الفكي الصديق ود اب ناجمة قال:

ناس رانفي بِنُوحوا مقربنين وعطيــــــش
انا مالي؟ مِحارب النوم ومابي العيـــــش
عاشقيالجرحو كاتم دمو ما في بشيـــــش
خلااس داركني ..عِلا الليهو عشة بعيش


احمد كيتا الهدندوي قال:
"إيداييب كُلها" بي شلاخ واب رشمة
كريكناب هاب للي ليما وتِكنِشـــــــما
الخلاني اكسر التوبة وين ما أطــــرا
اناقريت تيكا ما جلسو الاراملا مـــــا

سليمان الهدندوي قال:

يا قلبي الولي دمالك بقيت تشلا
قال من شوفة اللابس رهيف ومدلا
علي المربوعة قامتو وما الطويل و مخلا
سواي حاكا دهنوك السنوك الولا

عيد ود الشيخ عبد الله الزبيدي قال:

نحنا أولاد رشيد الخاصة بالدرهان
نحنا أهل الدعيلات ما بنسعىالضان
ننصب لها رايش نحنا نسكها بالسفهان
نرضي ست الجوجلية وكان


الله لا باركفيها ولابارك فيكم إنتو يالعجمان


معاً لنكتب وننشر هذا الأدب القومي ويجب أن نحافظ عليه من الإندثار كم كنت أتمني أن يفسح لهذا الشعر مجال للمعرفة في أقسام اللغة والتراث والفلكلور..