رد مع اقتباستعالي نعلم الشفع
كلمات: يحي فضل الله
بعض الاغاني صرخة لا تطرب
فإذا استفزتكم اغاني فاغضبوا
يا منشئين على الخرائب منزلي
تحت الخرائب وقدة تتفلب
ان كان جذعي للفنوس ضحية
جزري الأهم في الثرى يتأهب
حبالنا الجوه ما تخنت
حبال السما الممدود
حبال الصوت وكت يرجع
يجيب الخاطر المردود
تعالي نشوف .. غنيواتنا البقت في الدنيا ما بتشوف
تعالي نشوف .. حروف البكا الجواها ما في حروف
تعالي نشوف تعالي نطوف
على المدن البقت أشباح
على الجوع القعد مرتاح
على الكلمة البقت في الجوف
تفتش سكة الأفراح
تعالي نشوف .. منو البقدر ..
يخاصم طفلة صبحت هازلة
فوق مد الأسى الحرَّاق
ويا غنوتنا ما تفوتي .... ويا كلمتنا ما تموتي
وفتشي فوق ضمير الكلمة
عن وتراً رحل فراق .... وعن بلداً رحل فراق
وعن ولداً رحل فراق ..... وعن علماً رحل فراق
غنانا الفينا ما يشفع
حديثنا الجوة ما بينفع
تعالي نشوف ... تعالي نطوف
تعالي نعلم الشفع
الزمن الفلاني
كلمات: نجاة عثمان
لمن يجي الزمن الفلاني
سمانا بتقطر مطر
دري وتمازج
برتكاني
نسطر اسمك يا حبيبنا
في رموش غيم ارجواني
ندمن الضحك المعافى
نحيا في الفرح المورد
ياسميني واقحواني
يا حبيبنا
جوا عينيك عايشة ناس
بتسجل الايام أغاني
والطريق ماببقى ساهل
ليك بالمعنى المكاني
لما يتحقق زماني
بمسح الحزن المعشعش
في عيونك أسمراني
يا حبيبنا
بتحيا في حلم الترابله
وفي العلاقات المعاني
في البقاسي شقى المسافة
وعايشة في داخله وبيعاني
لما يتحقق زماني
بشرق الفجر الحقيقة
والصباح الأبيضاني
مريم الأخرى
كلمات:
محمد ابراهيم شمو
ها هي الأرض تغطت بالتعب
البحار اتخذت شكل الفراغ
وأنا مقياس رسم للتواصل والرحيل
وأنا الآن الترقب وانتظار المستحيل
انجبتني مريم الأخرى قطاراً وحقيبة
أرضعتني مريم الأخرى قوافي
ثم أهدتني المنافي
هكذا قد خبروني
ثم قالوا لي ترجل
ثم أنت .. أنت يا كل المحاور والدوائر
يا حكايات الصبا
تحفظين السر والمجد الذي
ما بين نهديك اختبأ
ليس يعنيك الذي قد ضاع من عمري هبا
وأنا لست أدري
ما الذي يدفعني دفعاً اليك
ما الذي يجعلني أبدو حزيناً
حين أرتاد التسكع في مرايا وجنتيك
لا عليك
فعلي هذي السفوح المطمئنة
نحن قاتلنا سنينا واقتتلنا
نحن سجلنا التآلف في انفعالات الأجنة
واحتوانا البحر والمد اليقاوم والشراع
يا هذه البنت التي تمتد في دنياي
سهلاً وربوعاً وبقاع
ما الذي قد صب في عينيك شيئاً
من تراجيديا الصراع
والمدى يمتد وجداً
عابراً هذي المدينة
خبريني هل أنا أبدو حزينا
هل أنا القاتل والمقتول حيناً والرهينة
هل أنا البحر الذي لا يأمن الآن السفينة
خبئيني بين جدران المسام
قبليني مرة في كل عام
فأنا أشتاق أن أولد في عينيك طفلاً من جديد
أرتدي اللون البنفسج
أعتلي شكل الهوية
ضيعتني مريم الأخرى
سنينا في انتظار المجدلية
آه لو تأتين آه؟!
من عميق الموج من صلب المياه
كالرحيل كالترقب وانتظار المستحيل
كالترقب وانتظار المستحيل
رعشة الشوق
كلمات: محجوب الحاج (أبوالسيد)
مرة بقصد احكي عنك
وقولي من طابعه الاشارة
شوفوا ديك القمرة بانت
والنجوم حاطت مدارا
غيبوا اتلاشوا في عيونها
وغوصوا في أعماق بحارا
وأبقوا اعرفوا من صفاها
كيف صبحت اسير هواها
ورأسي في ابعاد قرارا
إلا لو مرات سرحت
وقمت لمحت وقروني
وعرفوا كل البينا عامر
اصله باين في عيوني
اعرف انه بحسن نية
باحت الاعين شوية
افشوا سري وغافلوني
واتعرف ريدك متاعي
وانو فكري واقتناعي
والسعادة الضالة كوني
ويسألك يا ذاتي عنك
البراءة الفي عيونك
الرزانة الفي انفعالك
والضجيج الفي سكونك
أنتي أبعد من خيالي
ورعشة الشوق في سؤالي
بتحكي عن ابداع محاسنك
وعفة الطبع البصونك
واقف براك
كلمات: مدني يوسف النخلي
واقف براك
والهم عصف
ريحاً كسح زهرة صباك
ليلاً فتح شرفه وجع
قمراً رحل فارق سماك
مطر الحزن عاود هطل
جدد عذاب الأرصفة
ضي المصابيح البعيدة
أتعب عيونك وانطفا
لمتين مواعيدك سراب
والريد شقا وحُرقة وجفا
واقف براك
بعد المشاوير البقت
ممدودة في نبض التعب
بتعود وتلقى رجاك زول
حفظ الوداد زمناً صعب
والباقي من ليل الهوى
وعطر الصبابة الما انسكب
والباقي من كل الغنا
وسيل الكتابة الما نضب
في عيونك
كلمات: أبوذر الغفاري
في عيونك ضجة الشوق والهواجس
ريحة الموج البنحلم فوقو بي جية النوارس
ياما شان زفة خريفك كل عاشق أدى فرضو
وما في شمساً طاعمة طلت إلا تضحكي ليها برضو
والغمام الفيك راحل في الصنوبر يلقى أرضو
والصباح امتد ياما كل ما جاوبتي نبضو
نشتهيك وياما نحلم نحكي ليك عن المسافة
وعن سفن بالشوق بترسم في بحيراتك ضفافها
عن ملامح غنوة طلت في عويناتك هتافا
عن حقيقة نهاتي بيها وفي أساطير الخُرافة
يا صباحات المواني
حتى لو دربك ترنح في مشاوير الأغاني
والجرح ارتد بينا لي زمان الآهة تاني
يانا لا بنتحاشى صدك لا بتموت فينا الأغاني
يا غنانا المشتهنو
ياني موعود بي زمانك
بي مواقيتو البرنو
بي ارتعاش صرخة وجودك
يوم يطل ميلادي منو
لما اتوسد صباحك
ياتو ليل يفصلني عنو
سمحة وسمرية
كلمات: محمد طه القدال
سمحه وسمرية ومحبوبتي
ولفتانا غزاله
خضرة ومسقية وجنب النيل
مشتولة التاله
بهواك يابنية
كتبته قصيد
وبقوله مقالة
ينفتحي في معاني غناي
تجديلها مجالا
زهرة وبرية
بشوق الأرض عيونا كحالا
تريانة ندية بعرق الناس
والناس في بالا
ياخوفاً على عقل وثبات
ما ها الولوالة
من فرص البي
قلعت الخوف
وكستني بسالة
قتليها النية ..
متين نتلم
والحال بطالة
قالتلي غنية وأنت معاي
مستورة حاله
بت سودانية
ومحبوبتي
ولفتانا غزاله
أظنك عرفتي
كلمات: جمال حسن سعيد
أظنك عرفتي عواصفك مهبي
أباري في خيالك يسوقني ويودي
ونهرك يعدي ويجهل مصبي
هواجسي البتزرع وظني البربي
بديتك خواطر بتصحى وتساور
وطيفك يزاور وروحك تحاور
تجيبيني في زمانك موشح أساور
أقول بس نسيتك
وجرحك يتاور
أظنك عرفتي عذاب المغني
وطبله المجدّع شظايا التمني
حروفه البتجزع في لحظة تجني
وخطاه البتهرع متين تطمئني
مُسرّج خيالك حصاني القبيل
مُعَربد غباره وخلى الصهيل
مسافر مسافر وفاقد دليل
أظنك عرفتي هموم الرحيل
المفضلات