رعشة الشوق

كلمات: محجوب الحاج (أبوالسيد)

مرة بقصد احكي عنك
وقولي من طابعه الاشارة
شوفوا ديك القمرة بانت
والنجوم حاطت مدارا
غيبوا اتلاشوا في عيونها
وغوصوا في أعماق بحارا
وأبقوا اعرفوا من صفاها
كيف صبحت اسير هواها
ورأسي في ابعاد قرارا
إلا لو مرات سرحت
وقمت لمحت وقروني
وعرفوا كل البينا عامر
اصله باين في عيوني
اعرف انه بحسن نية
باحت الاعين شوية
افشوا سري وغافلوني
واتعرف ريدك متاعي
وانو فكري واقتناعي
والسعادة الضالة كوني
ويسألك يا ذاتي عنك
البراءة الفي عيونك
الرزانة الفي انفعالك
والضجيج الفي سكونك
أنتي أبعد من خيالي
ورعشة الشوق في سؤالي
بتحكي عن ابداع محاسنك
وعفة الطبع البصونك










.

هردت لهاتي

كلمات: محمد الحسن سالم حميد

سِني على النِضال ايدي سَوكِّي بالهُتاف فَمِّي ...
شوارعك لي، دويها عليّ اذا ما آخر العلاج الكيّ
مراويدك حُمُر يا أمي مراويدك حمر حمي
هردت لهاتي بالغنوات وقلت يبرد حشاك يا أمي
من التعب البلا صالح تقيفي تروقي تتجمي
تسوي مكانسك المطرة تضوي البيت وتنحمي
تمرقي صَبُوحة للجيران قدح فوق إيد وفي إيد ألمي
يلاقوك شُفَّع الكُتّاب نُضَاف وظراف بلا النسمي
يغنو لك غناوي الساب، وفي بيوضة ما في سراب
جبال كَجَمي وفيافي الكاب تميد بالخضرة منقسمي
فيافي الطي وبيوضة المراكيب فيها مفروضة
خدارها يراري شوف عيني على الأبواب
طواريها وقماريها وحواريها بقت روضة
بقت تشرب من الحامداب تشوفي رهاب بعد نجمي
وأشوفو قريب قُرب نضمِي
أشوف العالم التحتاني هيلا .. هوب وقف ناهض
هدَّ عوارض الفوقاني .. جوه الجُب رمى العارض
وفي السابو الدمار أفراق
عريق الحب نبض قابض
متل قبض الحروف في اسمي
وغناوينا القبيل رقراق علينا تصب برد قارص
وأجُر نمي
أدوبي لهاتي بالغنوات عُقُب يبرد حشاك يمي
وطني ولا ملي بطني ... سُكاتي ولا الكلام الني
بليلتي ولا ضبائح طي .. قَليلتي ولا كتر سِمي
سلام يمي .. سلام يمي ..
سلام لا هكمي لا دكمي
سلام يا أمي .. سلام يا أمي ..







.

الشجن الأليم

كلمات الشاعر صلاح حاج سعيد

عارفني منك
لا الزمن يقدر يحول قلبي عنك
لا المسافة ولا الخيال يشغلني منك
وتحرمني منك
والمواعيد لا بتجيب منك تودي
لا الزمن قادر يشيلني عليك أعدي
لا التحايا ولا المشاعر الحية في جوه الحنايا
لا رسالة تجيني منك .... لا خبر طمني عنك
وأنت سايق فيني ظنك
رغم انك إنت عارف انو منك
لا الزمن يقدر يحول قلبي عنك
لا المسافة ولا الخيال يشغلني منك
وأبقى بعدك في الأسى
وتبقى أنت الظالم القاسي النسى
وغصب عني أزيح ظنوني
وأقول عليك أنت المسامح
وفوق شجوني
أعيش زمان بالفرقة جارح
وفي احتمالي وبالي منك
أنت سايق فيني ظنك
رغم انك إنت عارف انو منك
لا الزمن يقدر يحول قلبي عنك
لا المسافة ولا الخيال يشغلني منك
يا هوى الألم النعيم
خليك على الوعد القديم
وخليني في الشجن الأليم
وأبقى في كل المداين ..
سكتي وسفري الجحيم
تبقى إيه الدنيا من بعدك تكون
وأبقى إيه بعدك أكون
ما في احتمالي وبالي إنك
أنت سايق فيني ظنك
رغم انك إنت عارف انو منك
لا الزمن يقدر يحول قلبي عنك
لا المسافة ولا الخيال
يشغلني منك
عارفني منك



.

أبداكي من وين .
الشاعر / أزهري محمد علي

أبداكى من وين .. وفينى منك لسة حاجات

من مخاوف ومن شجن

أبداكى من وين .. وظنى إنك

فكرة إعلان الحياة

وإنتهاءات العوارض والمحن

نفسى ألقاكى وأكون

أنا كلى من بعضك

أو .. بعضى من كلك بدن

وداير أبقاكى وأوحد دورة الدم

المقسمة بينى .. بينك .. والسحن

..........

أبداكى منى .. ولاّ منِّك

أبتديكى محل .. محل

من ياتو منفذ أدخلك

وكل المنافذ فيكى سدّاها النحل

من ياتو شارع أوصلك

وكل الدروب معطونة لى آخر الوحل

.. أستبيح كل الحواجز .. وأدخلك

من كلامك بدخلك

من بين مسامك بدخلك

من أى قاسم مشترك

وشبهة تشابه .. ادخلك

ونتلاقى نهرين من تسامى .. وإشتها

وأبداكى من حيث أنتهت عندك خواتم الإنتها

أبداكى .. وأخلع خيام عمرى المضى

وألقاكى مبسوطة اليدين

مفتوحة أبواب الرضا

أبداكى من لحظة أنستِكْ نار

وأخدت من قبسك .. هُدى

وأنا ضُمّة زاهد

فى الدروب الما بتجيك

.. ولا بترجِّع ليا من تالاك صدى

أبداكى من وين ؟ ..









فى عيونك
**********
الشاعر ابوذر الغفارى

فى عيونك ضجة الشوق والهواجس
ريحة الموج البنحلم فوقو بى جية النوارس
ياما شان زفة خريفك كل عاشق أدى فرضو
مافى شمسا طاعمة طلًت اٍلا تضحكى ليها برضو
والغمام الفيك راحل فىالصنوبر يلقى ارضو
والصباح اٍمتد ياما كل ما جاوبتى نبضو
فى عيونك ضجة الشووووق
نشتهيك
ياما نحلم نحكى ليك عن المسافة
وعن سفن بالشوق بترسم فى بحيراتك ضفافها
عن ملامح غنوة طلت فى عويناتك هتافها
عن حقيقة نهاتى بيها فى أساطير الخرافة
فى عيونك ضجة الشوووق
يا صباحات الموانئ
حتى لو دربك ترنَح فى مشاوير الاغانى
والجرح اٍرتد بينا لى زمان الآهة تانى
يانا لا بنتحاشى صدٍك لا بتموت فينا الاغانى
يا غنانا المشتهنو
يانى موعود بى زمانك
بى مواقيتو البرٍنو
بارتعاش صرخة وجودك
يوم يطٍل ميلادى منو
لما اٍتوسد صباحك
ياتو ليل يفصلنى عنو





.

الحزن النبيل
***********
الشاعر صلاح حاج سعيد


وبقيت اغنى عليك
غناوى الحسرة والاسف الطويل
وعشان اجيب ليك الفرح
رضيان مشيت للمستحيل
ومعاك فى اخر المدى
فُتينى يا هجعة مواعيدى القبيل
بعتينى لى حضن الاسى
وسبتينى للحزن النبيل
ومشيت معاك كل الخطاوى الممكنة
وبقدر عليها وبعرفها
اوفيت وما قصرت فى حقك
ولا كان عرفة غيرك اصادفها
وقدر هواك يجيبنى ليك
جمَع قلوبنا وولفها
وكتين بقيتى معاى فى اعماقى
فى اعماق مشاعرى المرهفة
لا منك ابتدت الظروف
لا بيك انتهت الامانى المترفة
ندمان انا
ابدا وحاتك
عمرى ما شلت الندم
ما اصلو حال الدنيا
تسرق منية فى لحظة عشم
وانا عندى ليك كان الفرح
رغم احتمالى اساك
يا جرح الالم
كان خوفى منك
جاى من لهفة خطاك
على المواعيد الوهم
اهو نحن فى الاخر سوا
باعنا الهوى
ما شين على سكة عدم
وبقيت اغنى عليك
عناوى الحسرة والاسف الطويل